شۆفار گۆڤارێکه که به شێوهی کاتنامه چاب دهکرێت و بڵاڤۆکی ئهنجومهنی ڕیازی زانکۆی پهیام نووری مهریوانه. ژمارهی ۵ی ئهم گۆڤاره به تازهیی له چاپ دراوه، لهم ژمارهیهدا ئهم کهسانهی خوارهوه بهشدارن:
خاوهن ئیمتیاز: ئهنجومهنی ڕیازی پهیام نووری مهریوان
سهردهبیر: مریهم ڕووبینا
سهرنووسهر: هێرۆ دانش
ویراستار: موحهمهد ساڵحی و کولسووم مینویی
ئهمڕۆ چوارشهممه، ۲۸ی سهرماوهز بنهماڵهی بووتیمار دوای ماوهیهکی ههره زۆر توانیان به شێوهی حوزووری دیداری هیوا بکهن.
لهم دیدارهدا بووتیمار ڕایگهیاندوه که له بهندیخانهی گشتیی دا ئهو له سلوولی تاکه کهسیدایه، چاوی به هیچ بهندیهکی تر ناکهوێت و مافی ئهوهی نیه که وهکوو زیندانیهکانی تر بڕوات بۆ ههوا خۆری یان ئهوهی پێوهندی تهلهفوونی ههبێت له گهڵ بنهماڵهکهیدا.
شایانی باسه هاوسهری هیوا بووتیمار داوای له دادوهر سوڵتان بهخش کردبوو که ئیزنی ئهوهی پێ بدات ڕۆژنامه بنێرێت بۆ هیوا بهڵام سوڵتان بهخش تهنها ئیزنی ناردنی ڕۆژنامهی ئێران(ایران)ی پێ دابوو. بۆیه هیوا ئێستا تهنها شتێک که بهدهستی دهگات بۆ خوێندنهوه ڕۆژنامهی "ایران"ه که ڕۆژنامهیهکه سهر به باڵی موحافزه کاری دهسهڵاتدارانی کۆماری ئیسلامی.
هیوا بووتیمار چالاکی مهدهنی دوای ماوهیهکی زۆر له بهندیخانهی گشتیی سنهوه بۆ بهندیخانهی گشتیی مهریوان گواسترایهوه.
بووتیمار یهک له دامهزرێنهرانی ئهنجومهنی سهوزی چیا که ئهنجومهنێکه بۆ پاراستنی ژینگهو سهرچاوه سروشتیهکان، بوو که زستانی ڕابردوو له لایهن هێزهکانی ئیتیلاعاتی مهریوانهوه دهستگیر کراو پاشان بۆ ئیتیلاعاتی سنه گواسترایهوه. بووتیمار دوای نزیکهی حهوت مانگ دهستبهسهر بوون له زیندانه جۆراوجۆرهکاندا له لایهن دادگای شۆڕشی مهریوان شوعبهی یهک به دادوهری دادوهر سوڵتان بهخش بڕیاری له سێدارهدانی بهسهردا سهپێندرا. بهڵام ئهم حوکمه له لایهن دیوان باڵای وڵات به شێوهی کاتی ڕهت کرایهوه.
ڕۆژی ۳۰ی نوامبهر هیوا بووتیمار و عهدنان حهسهن پوور ڕۆژنامهوانی مهریوانی له وڵاتی ئیتالیا خهڵاتی ڕۆژنامهوانی ئازادیان پێشکهش کرا، خهڵاتهکان درا به براو خوشکی ئهوان به نوێنهرایهتی ئهو دوو دیلکراوه.
بڕیار وایه بووتیمار له لایهن ههمان دادوهرهوه دادگایی بکرێتهوهو نادیاره که ئهمجاره چ حوکمێکی بهسهردا دهسهپێندرێت.
ئهمڕۆ ههینی کاتژمێر ۴.۵ ی دوانیوهڕۆ، له ڕێگهی مهریوان-سهقز له نزیک کۆنه پردهکهی گاڕان له نێوان هێزهکانی ئیتیلاعاتی سوپاو کهسانی نهناسراو شهڕوپێکدادان ڕووی داوه.
ڕووداوهکه ئاوا بوه که ماشینێکی پاتڕۆڵ به ڕهنگی سپی له ڕێگهی سهقزهوه بهرهو مهریوان ئهگهڕێتهوه ئهکهوێته بهر دهستڕێژی هێزهکانی ئیتیلاعاتی سوپا. موسافرهکانی ناو ماشینهکه دهرنهکهوتوه چهند کهس بوه بهڵام لانی کهم یهک کهس لهوانه ههرلهوێدا کوژراوهو تهرمهکهی به ماشینێکی توویوتای F-4.5 ی سوپا بۆ شوێنێکی نادیار گواستراوهتهوه.
شایانی باسه چهکدارانی ئیتیلاعاتی سوپا که زیاتر له ۳۰ کهسێک دهبوون ههموویان جلی کوردیان له بهر بوه. بهرپرسانی ناسراو لهم شهڕهدا، عوسمان جیهانی و هیوای تاب (جێگری ئیتیلاعاتی سوپای مهریوان) بوون.
"کهریم ئابخوون" خهڵکی ئاوایی گرده ڕهش (گوندێک له نێوان مههاباد و میاندواو) سهر به قهزای میاندواو، سهرلهبهیانی ڕۆژی چوارشهممه ۷ی سهرماوهز که له پاسگای هێزی ئینتیزامیی میاندواو سهرباز بوه به دهستی ئهفسهرێکی ههمان پاسگا دهکوژرێت.
هۆکاری کوشتنی کهریم مشت و مڕێکی زۆر ئاسایی بوه؛ ئهفسهری بکوژ که بۆ خۆی له تورکهکانی میاندواوه فهرمانی به کهریم داوه که بڕوات شتێکی بۆ بهێنێت، کهریمیش فهرمانهکهی به جێ هێناوه بهڵام ئهفسهرهکه به بیانووی ئهوهی که کهریم به شێوهیهکی ناخۆش ئهو شتهی تهحویل داوه، کۆڵته کهمهریهکهی خۆی دهردههێنێت و ههرلهوێدا به تهقاندنی یهک گوله دهیکوژێت.
شایانی باسه له کاتی کوشتنی کهریم دا سهربازی تریش لهوێدا شایهد حاڵی ڕووداوهکه بوون و ڕاشیان گهیاندوه ئامادهن له ههر کاتێکدا پێویست بوو له دادگادا شایهدی خۆیان بدهن.ئهفسهری بکوژ ئێستا به شێوهی کاتی بهند کراوهو له لێپرسینهوه سهرهتاییهکاندا دیان بهوهدا ناوه که ئهو تهقهی لهو سهربازه کردوه بهڵام مهبهستی کوشتن نهبوه.
تهرمی کهریم توێکاری کراوهتهوه بهڵام هێشتا وهڵامهکهی ڕانهگهیهندراوه، ههروهها به بنهماڵهی کهریم پێشنیار کراوه که ئێوه دهکهین به بنهماڵهی بونیاد شههید، یان ئهوهی که دیهتان پێ ئهدهین و به کورتی ئهیانهوێت به جۆرێک ڕووداوهکه به پارهو شتی وا تهواو بکهن.
وهک ئهزانین لهم ماوهیهی دواییدا ناکۆکی نێوان کوردان و تورکهکان زۆر بوهو سووکایهتی به گهلی کورد له لایهن تورکهکانی ورمێوه به تایبهت تهشهنهی سهندوه، بۆیه پێدهچێت ئهم ڕووداوهش درێژهی ئهو کێشانه بێت که له شوێنهکانی تر دروست بوه.
ههواڵنێر: کاردۆ مهریوانی
