خۆسووتاندنی ژنێک له‌ مه‌ریوان...

فاتمه‌ی ته‌مه‌ن ۳۵ ساڵان ژنی پیاوێک به‌ ناوی عارفی حاجی فه‌تاح، خه‌ڵکی ئاوایی وه‌یسه‌ دوێنێ ئاگری له‌ جه‌سته‌ی خۆی به‌ردا.

فاتمه‌ قوربانیی نه‌ریتی ناشیرینی ژن به‌ ژنه‌. باوکی فاتمه‌ و عارفی شووی فاتمه‌ هه‌ردووکیان کچی خۆیان داوه‌ به‌ ژن. ئه‌م نه‌ریته‌ دزێوه‌ وه‌کوو هه‌میشه‌ ناڕه‌زایه‌تی یه‌ک یان هه‌ردوو لایه‌نه‌که‌ی پێوه‌ بوه‌، بۆیه‌ فاتمه‌ باروودۆخه‌که‌ی بۆ ته‌حه‌مول نه‌کراوه‌و خۆ کوشتنی به‌ ته‌نیا ڕێگا چاره‌ زانیوه‌.

فاتمه‌ خاوه‌نی سێ منداڵی بچووکه‌، ئێستا باری ته‌ندروستی باش نیه‌و له‌ نه‌خۆشخانه‌یه‌کی شاری سنه‌دایه‌.

سه‌ره‌خۆشی

به‌ بۆنه‌ی کۆچی دوایی "خه‌لیفه‌ عه‌لی"باوکی به‌ڕێزان هادی و هیوا بووتیمار سه‌ره‌خۆشی له بنه‌ماڵه‌که‌یان ده‌که‌م و داواکارم ئێمه‌ش به‌ شه‌ریکی خه‌می خۆیان بزانن.

 

 

 

               

 

                                                      به‌ڕێوه‌به‌ری وێبلاگی بنار

عه‌دنان و هیوا خه‌ڵاتی ساڵانه‌ی رۆژنامه‌نووسیی ئازادی ئیتالیایان به‌ده‌ست هێنا

خۆرهه‌ڵات نیوز: "هیوا بوتیمار" چالاكی مه‌دنی و "عه‌دنان حه‌سه‌ن پوور" رۆژنامه‌نووسی كورد خه‌ڵاتی رۆژنامه‌نووسیی ئازادی ئیتالیایان به‌ ده‌ست هێنا و بڕیاره‌ له‌ رۆژی 30 نوڤه‌مبری داهاتوو له‌ به‌رده‌م شاره‌وانی "سییه‌نا" سه‌ر به‌ویلایه‌تی "توسكانی" ئه‌و وڵاته‌  پێشكه‌ش به‌ بنه‌ماڵه‌ی ناوبراوان بكرێ.

 

 خه‌ڵاتی رۆژنامه‌نووسیی ئازاد كه‌ ساڵانه‌ له‌ لایه‌ن ناوه‌ندی ناحوكوومیی "گواستنه‌وه‌ی زانیاری و پاراستنی گیانی په‌یامنێران" ی ئیتالیا، پێشكه‌ش به‌و رۆژنامه‌نووسانه‌ ده‌كرێ كه‌ قه‌له‌مه‌كه‌یان له‌ رێگای ئازادیدا به‌كاردێنن. ساڵی 2005 ناوه‌ندی ناوبراو خه‌ڵاتی ساڵانه‌ی خۆی پێشكه‌ش به‌ "ئه‌كبه‌ر گه‌نجی" رۆژنامه‌نووسی ئێران كردبوو.

 

 عه‌دنا حه‌سه‌ن پوور و هیوا بوتیمار دوو چالاكی كوردی رۆژهه‌ڵاتی كوردستان كه‌ له‌ لایه‌ن دادگای شاری مه‌ریوان به‌ سزای سێداره‌ مه‌حكووم كراون  و ئێستا له‌ زیندانی گشتی شاری سنه‌ ده‌ستبه‌سه‌رن و وه‌ك بنه‌ماڵه‌كه‌یان له‌ به‌یاننامه‌ێكدا پێشتر بڵاویان كردبۆوه‌ له‌ بارودۆخێكی ناڵه‌باردا ده‌ژین به‌ شێوه‌یه‌ك كه‌ له‌ سه‌ره‌تایی ترین ماڤه‌كانی خۆیان بێٍ به‌هره‌ كراون.

 

گێڕانه‌وه‌ی ورده‌کاریه‌کانی کوشتنی عه‌تا له‌ زاری مامه‌یه‌وه‌ که‌ له‌ گه‌ڵیدا بوه‌...

عه‌تای به‌هرامی که‌ شه‌وی چوارشممه‌ به‌ ده‌ستی هێزه‌کانی سه‌ر سنووری کۆماری ئیسلامی کوژرا، کاتی کوشتنه‌که‌ی له‌ گه‌ڵ مامه‌یه‌کی خۆی به‌ ناوی ئه‌بووبه‌کر به‌هرامی دا بوه‌، ئه‌بووبه‌کر ئاوا باسی ڕووداوه‌که‌ ئه‌کات:

 نزیکه‌ی ئێواره‌ بوو له‌ گه‌ڵ عه‌تا دا هه‌ر یه‌ک به‌ ئه‌سپێکه‌وه‌ به‌ره‌و مه‌رزی باشماخ  ڕێکه‌وتین، باری ئه‌سپه‌کان قاڵی بوو به‌ هه‌ردووکمان چوار قاڵیمان پێ بوو، کاتێ گه‌یشتینه‌ نزیک کاناڵه‌که‌ گورووبانێک و ئه‌فسه‌رێک ڕێیان پێ گرتین. بۆمان وتن که‌ باره‌کانمان قاڵیه‌و به‌س به‌ڵام ئه‌فسه‌ره‌که‌ وتی ئه‌بێ بتانبه‌م بۆ پازگای سه‌ره‌وه‌، به‌ منیان وتوه‌ هه‌ر جۆره‌ که‌ل و په‌لێکی قاچاخ ئه‌بێ بهێنرێت بۆ بنکه‌ی فه‌رمانده‌یی. ئێمه‌ش وتمان باشه‌ مادام وایه‌ با بڕۆین، من له‌ ئه‌سپه‌که‌م دابه‌زیم عه‌تا هێشتا دانه‌به‌زیبوو. ئه‌فسه‌ره‌که‌ ده‌ستی برد هه‌وساری ئه‌سپه‌که‌ی عه‌تا بگرێت به‌ڵام ئه‌سپه‌که‌ سڵه‌ماوه‌و هه‌ڵات تۆزێ نه‌ڕۆیشت که‌ عه‌تا له‌و هه‌ڵته‌ک هه‌ڵته‌که‌دا به‌ سه‌ر ئه‌سپه‌که‌یه‌وه‌ داکه‌وت. هه‌رکه‌ داکه‌وته‌ خواره‌وه ‌ئه‌فسه‌ره‌که‌ گرتیه‌ ژێر ڕه‌گباری گوله‌، ... (به‌ده‌م گریانه‌وه‌) عه‌تای برازام هه‌ر له‌وێدا گیانی خۆی له‌ ده‌ست دا.

کوژرانی لاوێکی تری مه‌ریوانی...

"عه‌تای به‌هرامی" ناسراو به‌ عه‌تای ڕه‌حمانی مامه‌ ڕه‌شه‌ ته‌مه‌ن ۱۸ساڵ خه‌ڵکی ئاوایی جه‌ژنیاوا (له‌ گونده‌کانی سه‌ر سنوور) شه‌وی ڕابردوو له‌ کاتێکدا ئه‌یوست به‌ ئه‌سپه‌که‌ی بچێت بۆ سه‌ر سنوور و به‌ هناینی که‌ل و په‌ل بژێوی ژیانی خۆی و بنه‌ماڵه‌که‌ی دابین بکات به‌ گوله‌ی پاسه‌وانه‌کانی سه‌رسنووری کۆماری ئیسلامی گیانی خۆی له‌ ده‌ست دا.

شایانی باسه‌ عه‌تا ته‌نها کوڕی ئه‌و بنه‌ماڵه‌ بوو، ئه‌ویش ‌ وه‌کوو زۆربه‌ی لاوه‌کانی ئه‌م ناوچه‌یه‌ له‌ ناچاریدا ڕوو ده‌که‌نه‌ ئیشه‌کانی سه‌ر سنوور که‌ زۆربه‌ی کات گیانیان له‌ مه‌ترسیدایه‌. ‌ 

باروودۆخی خراپی عه‌دنان و هیوا له‌ به‌ندیخانه‌نه‌ی گشتیی دا...

"عه‌دنان حه‌سه‌ن پوور" و "هیوا بووتیمار" که‌ ۸ ڕۆژ له‌مه‌و پێش له‌ به‌ندیخانه‌ی ئیتیلاعاته‌وه‌ بۆ به‌ندیخانه‌ی گشتیی گواسترانه‌وه‌ له‌ بارودۆخێکی خراپدا به‌سه‌ر ده‌به‌ن.

بنه‌ماڵه‌ی ئه‌و دوو به‌ندکراوه‌ دوای تێپه‌ڕکردنی ته‌نگ و چه‌ڵه‌مه‌یه‌کی زۆر توانیان ئه‌و دوانه‌ له‌ پشتی شیشه‌وه‌ ببینن. عه‌دنان و هیوا ئاوا باسی باروودۆخی به‌ندیخانه‌که‌یان ده‌که‌ن:

ئێمه‌ له‌ به‌ندێکداین که‌ پێی ده‌ڵێن به‌ندی نیزامی، له‌م به‌نده‌دا ۴۰ که‌سی تێدایه‌، ئیمکاناتێکی زۆر هه‌یه‌ لێره‌ بۆ به‌ندکراوه‌کان، بۆ نموونه‌ کتێبخانه‌و وه‌رزشگه‌و کیوسکی ته‌له‌فوون هه‌یه‌و هه‌روه‌هادوکتریشی تێدایه‌ بۆ چاره‌سه‌رکردنی نه‌خۆشیه‌کان، به‌ڵام به‌داخه‌وه‌ که‌ڵک وه‌رگرتن له‌و ئیمکاناته‌ بۆ ئێمه‌ قه‌ده‌غه‌یه‌. ئێمه‌ بۆمان نیه‌ کتێب بخوێنینه‌وه‌، وه‌رزش بکه‌ین و بۆ بنه‌ماڵه‌کانمان ته‌له‌فوون بکه‌ین یان ئه‌وه‌ی که‌ بچینه‌ لای دوکتور بۆ چاره‌سه‌ر کردنی نه‌خۆشیه‌کانمان. هاوبه‌نده‌کانمان له‌و مرۆڤانه‌ نین بتوانین هیچ پێوه‌ندیه‌ک له‌ گه‌ڵیان بگرین، مرۆڤ کوژو مه‌واد فرۆش و دز و ... له‌وانه‌ له‌ لامان ئه‌ژیه‌ن.له‌ به‌ندیخانه‌ی ئیتیلاعات دا لانی که‌م له‌م جۆره‌ مرۆڤانه‌ به‌ دوور بووین.

گواستنه‌وه‌ی عه‌دنان و هیوا بۆ به‌ندیخانه‌ی گشتیی سنه‌...

"عه‌دنان حه‌سه‌ن پوور" و "هیوا بووتیمار" دوای دوو مانگ و ۹ ڕۆژ به‌سه‌ر بردن له‌ به‌ندیخانه‌ی ئیتیلاعات دا، ڕۆژی یه‌کشه‌ممه‌ "۱" خه‌زه‌ڵوه‌ر بۆ به‌ندیخانه‌ی گشتیی شاری سنه‌ گوێزرانه‌وه‌.

ناوبراوان چه‌ند ڕۆژ پێش ڕاگه‌یاندنی حوکمه‌که‌یان له‌ به‌ندیخانه‌ی گشتیی شاری مه‌ریوانه‌وه‌ به‌ره‌و شوێنێکی نادیار بران، دوای نزیکه‌ی دوو حه‌فته‌ بنه‌ماڵه‌کانیان ئاگادار بوونه‌وه‌ که‌ ئه‌و دوانه‌ له‌ به‌ندیخانه‌ی ئیتیلاعات دان و تا ماوه‌یه‌کی زۆریش هه‌ر جۆره‌ سه‌ردانێکیان قه‌ده‌غه‌ بوو.

شایانی باسه‌ عه‌دنان و هیوا کاتێ که‌ له‌ به‌ندیخانه‌ی ئیتیلاعات دا بوون بۆ ماوه‌ی ۴۸ ڕۆژ مانیان له‌ نان خواردن گرت که‌ یه‌ک له‌ داخوازیه‌کانیان، گواستنه‌وه‌یان بۆ به‌ندیخانه‌ی گشتیی بوو.